Мы очень рады видеть вас, Гость

Автор: KES Тех. Администратор форума: ЗмейГорыныч Модераторы форума: deha29ru, Дачник, Andre, Ульфхеднар
  • Страница 1 из 1
  • 1
Модератор форума: serGild  
Красницкий Евгений. Форум сайта » 5. Академия (Реальная история) » Право 12 век » 2. Церковные уставы Владимира и Ярослава (Законы о преступлениях против морали)
2. Церковные уставы Владимира и Ярослава
serGildДата: Воскресенье, 28.02.2010, 01:22 | Сообщение # 1
Ближник
Книжник
Группа: Советники
Сообщений: 4175
Награды: 0
Репутация: 4063
Статус: Оффлайн
Церковный устав Владимира

В имя Отца и Сына и Святого Духа. Се аз, князь Володимир, нареченый во святом крещении Василий, сын Святославль, внук Игорев, блаженыа княгини Олгы, принял есъми святое крещение от греческаго царя Константина и от Фотиа патриарха Царигородскаго. И приах от него перваго митрополита Михаила Киеву, иже крести всю Рускую землю святым крещением.

Потом, летом многым минувшим, създах церковь святыа Богородица Десятинную, и дах ей десятину изо всего своего княжениа, и такоже и по всей земли Руской ис княжениа в соборную церковь: от всего княжа суда десятую векшю, ис торгу десятую неделю, а из домовь на всякое лето от всякого стада и от всякого жита чюдному Спасу и чюдней Богородици.

Потом растворивше греческий Намаканон и обретохом в нем, оже не подобает сих судов и тяж князю судити, ни бояром его, ни тивуном. И аз, съгадав с своими детми, и с всеми князи, и с своими бояры, дал есми те суды церквам Божьим, митрополиту и всем епископом по Руской земли.

И посем не надобе уступатися ни детем моим, ни внучатом, ни всему роду моему до века, ни в люди церковныа, ни в вси суды их. То все дал есми Церкви Божий по всем городом, и по погостом, и по свободам — где ни суть хрестиане. И своим тивюном приказываю судов церковных не судити, и наших судов без судий митрополичьих не судити десятин деля.

Роспуск, смилное заставание, пошибание, умычкы, промежи мужем и женою о животе их, в племени или в сватовьстве поимутся, ведовьство, потвори, чяродеание, волхъвование, зеленничьство, уреканиа три: бляднею, и зелий, и еретичьством, зубояжа, или сын отца биеть, или матерь дочка биеть, или сноха свекровь, или кто уречется скверными словы и прилагая отца и матерь, или сестры, или дети, а любо племя, тяжутся о задници, церковнаа татба, мертвеци сволочать, крест посекут, или на стенах трескы емлють из креста, скот или псы, птици без велики нужда въведеть в церковь, или что неподобно церкви съдееть, или два друга иметася бита, единого жена другаго иметь за лоно и роздавить, или кого застануть с четвероножною, или кто под овином молится, или в ржи, или под рощением, или у воды, или девка дитя повръжеть.

Тыи вси суды церквам Божьим даны суть законом Божьим, по правилом святых отец христианьскыми цари и князи в всех христианьских людех.

Князю, и бояром, и судиам в ты суды нелзе въступатися: то все дал есми по прьвых царевь уряжению, и по вселенскых святых отець седми Събор Вселеньскых, святитель великых.

Князю, и бояром, и судиам не прощено от закона Божья вступатися в тыя суды.

Аще кто преобидит сии устав, таковым непрощенном быти от закона Божья, горе себе наследують.

И своим тивуном приказываю судовь церковьных не обидети и с судов городскых давати 9 частей князю, а десятая чясть святей Церкви.

Се же искони поручено Богом святителем и епископьам их: городскиа и торговыа, всякаа мерила и спуды, извесы, ставила, от Бога како искони уставленое, митрополиту блюсти бес пакосъти — ни умалити, ни увеличити, за все то въздати ему слово в день суда Великого, якоже о душах человеческых.

А се люди церъковни, предании митрополиту по правилом: игумень, игуменья, поп, диакон, попадьа, диаконица и дети их и кто в клиросе, чернець, черница, проскурница, пономарь, лечець, прощеник, баба вдовица, задушьный человек, прикладень, сторонникь, слепець, хромець, монастыреве, больницы, гостинници, странноприимци, а кто порты чернеческыа съвръжеть.

Те люди церковный, богадельныя, митрополит ведаеть промежи ими суд, или обида которая, или задница. Аще ли иному человеку будеть с ними суд, или обида которая, то обчий суд, а присуд и пересуд на полы.

Аще кто преступить сиа правила, якоже есмь управил по святых отець правилом и первых царь управлению, кто иметь преступати правила си: или дети мои князи, или правнуци, или в котором городе наместник, или судья, или тивун — а имуть обидети суды церковныа или отьимати, да будуть прокъляти в сии век и в будущий о седми Събор святых отець Вселеньскых.

Устав, бывши и преже нас в Руси от прадед и дед наших: имати митрополиту десятину от дани, и от виры, и от продаж, и от лова княжа — что уходить во двор княжь, от всего.


Cообщения serGild
Красницкий Евгений. Форум. Новые сообщения.
serGildДата: Воскресенье, 28.02.2010, 01:43 | Сообщение # 2
Ближник
Книжник
Группа: Советники
Сообщений: 4175
Награды: 0
Репутация: 4063
Статус: Оффлайн
Церковный устав Ярослава

Се аз, великый князь Ярослав, сын Володымеров, по данию отца своего съгадал есмь с митрополитом Ларионом, сложил есми греческый Номоканон, иже не подобаеть сих тяж судити князю и бояром, дал есми митрополиту и епископом те суды, что писаны в правилех, в Номоканонех, по всем городом и по всей области, где христианьство.

Аще кто умчит девку или насилит: аще боярьская дочка, за сором ей 5 гривен золота, а митрополиту 5 гривен золота; а менших бояр - гривна золота, а митрополиту гривна золота; а добрых людей - за сором ей 5 гривен серебра, а митрополиту 5 гривен серебра; а на умычницех - по гривне серебра митрополиту, а князь казнит.

Аще кто пошибает боярьскую дочку или боярьскую жену, за сором ей 5 гривен золота, а митрополиту 5 гривен золота; а меньших бояр - гривна золота, а митрополиту гривна золота; а нарочитых людий - 3 рубли, а митрополиту 3 рубли; а простой чади - 15 гривен, а митрополиту 15 гривен, а князь казнит.

Аще пустит боярин велик жену без вины, за сором ей 5 гривен злата, а митрополиту 5 гривен злата; а нарочитых людий - 3 рубли, а митрополиту 3 рубли; а простой чади - 15 гривен, а митрополиту 15 гривен.

Аще в отца и в матере дочка девкою детяти добудете, обличив ю, понята в дом церковный; такоже и женка, а чим ю род окупит.

Аще девку умлъвит кто к собе и дасть ю в толоку, на умлъвъници митрополиту 3 гривны серебра, а девце за сором 3 гривны, а на толочанех по рублю; а князь казнит.

Аще муж от жоны блядет, митрополиту в вине.

Аще мужь оженится иною женою, с старою не роспустився, муж той митрополиту в вине, а молодую в дом церковный, а с старою жити. Аще же не лихый недуг болит: или слепота, или долгая болезнь,- про тое не пупустити; такоже и жене нелзе пустити мужа.

Аще жена у мужа крадет, а обличит ю, митрополиту 3 гривны, а муж казнит; про то не разлучити.

Аще клеть покрадет, такоже творят над нею.

Аще девка засядеть: великых бояр - митрополиту 5 гривен золота; а менших бояр - митрополиту гривна золота; а нарочитых людий - 12 гривен серебра, а митрополиту 12 гривен; а простой чади - гривна серебра, а митрополиту гривна серебра.

Аще поидет жена от своего мужа за иный муж, тую жену понята в дом церковный, а новоженя митрополиту в продажи.

Аще кум с кумою блуд створит, митрополиту гривна золота и в опитемьи.

Аще кто зажьжет двор, или гумно, или что иное, митрополиту 100 гривен, а князь казнит.

Аще кто с сестрою сгрешит, митрополиту 100 гривен, а у в опитемии и в казни по закону.

Аще ближний род поимется, митрополиту 8 гривен, а их разлучити, а опитемью да приимут.

Аще две жене кто водить, митрополиту 40 гривен; а котораа подълегла, тую понята в дом церковный, а первую держати по закону; а иметь лихо водити, казнию казнити его.

Аще муж и с женою по своей воли распустятся, митрополиту 12 гривен; а будут невенчалныи - митрополиту 6 гривен.

Аще жидовин или бесерменин с рускою будеть иноязычници, митрополиту 8 гривен, а руска понята в дом церковный.

Аще кто съблудит с чръноризицею, митрополиту 100 гривен; а с животиною 12 гривен, а в опитемью вложит.

Аще свекорь с снохою сблюдит, митрополиту 100 гривен, а опитемья по закону.

Аще кто с двема сестрами падется, митрополиту 30 гривен.

Аще и с мачехою кто сблудит, митрополиту 40 гривен.

Аще два брата будуть с одиною женкою, митрополиту 100 гривен; а женка в домь.

Аще девка не восхочет замуж, а отец и мати силою дадут, а что сътворит над собою, отец и мати митрополиту в вине, а исторь има платити; також и отрок.

Аще кто зоветь чюжюю жену блядью: великых бояр - за сором ее 5 гривен золота, а митрополиту 5 гривен, а князь казнит; а будет менших бояр - за сором ее 3 гривны золота, а митрополиту 3 гривны золота; а будет городскых людий - за сором ее 3 гривны серебра, а митрополиту 3 гривны серебра; а сельскых людий - за сором ее гривна серебра, а митрополиту гривна серебра.

Аще кто пострижеть голову или бороду, митрополиту 12 гривен, а князь казнит.

Аще муж имет красти конопли, или лен, или всякое жито, митрополиту в вине, с князем на полы; також и женка, аще имет то красти.

Аще муж крадет белый порты, или полотна, или портища поневы, також и женка, митрополиту в вине, с князем на полы.

Аще имет красти свадебное и огородное, бои и убийства, а что учинитися душегубьство: платять вину, князю с митрополитом на полы.

Аще про девку сыр будеть краань, за сыр гривна; а што стеря заплатять, а митрополиту 6 гривен, а князь казнит.

Аще мужа два бьются женски или вкусит, или одерет, митрополиту 3 гривны.

Аще мужь бьеть чужую жену, за сором ей по закону, а митрополиту 6 гривен, а князь казнит.

Аще сын бьеть отца или матерь, казнить его волостельскою казнию, а митрополиту в вине.

Аще девка въсхощет замуж, а отець и мата не дадуть, а что сътворить, митрополиту у вине отець и мати; такожь и отрок.

Аще чрьнеуь, или чрьница, поп, или попадиа, или проскурница впадут во блуд, тех судить митрополиту опрочь мирян, во что их осудить волен.

Аще поп или чрънец упиются без времени, митрополиту в вине.

Аще чрънець или чръница рострижется, митрополиту в вине, во что их обрядит.

А что деется в домовьных людех, и в церъковных, и в самех манастырех, а не уступаются княжий волостели в то: да ведають их митрополичьи волостели, а безатщина их митрополиту поидет.

Аще две жене бьетеся, митрополиту 6 резань на виноватой.

Аще без вины свекор биеть сноху или деверь ятровь, то платять ей по закону, а митрополиту 6 гривен.

Аще что кто поганое ясть у своей воли, или медведину, или иное что поганое, митрополиту в вине и в казни.

Аще поп дитя крестит в чюжем уезде или иное что священическое, разве и нужа, и болезни, митрополиту в вине. С некрещенным, а иноязычьником от нашего языка, с некрещеными ни пяти, ни ести; доколе же крестяться; аще кто ведаа ясть и пиеть, да будеть митрополиту в вине.

Аще кто с отлученым ясть и пиеть, сам отлучен будет.

Аще кто с бесерменкою или с жидовькою блуд сътворит, а не лишится, от Церкви да отлучится и от христиан, а митрополиту 12 гривен.

А теми винами разлучит мужа с женою:

1 вина. Аще услышить жена от иных людей, что думають на царя или князя, а она мужу своему не скажет, а опосле объяснится,- разлучити.

2 вина. Аще застанеть муж свою жону с прелюбодеем или како учинить на нее исправу с добрыми послухы,- разлучити. Аще думаеть жена на своего мужа или зелием, или иными людми, или пакь иметь ведать, что хотят мужа ея убита, а она мужу своему не скажет, а опосле объяснится,- разлучить.

3 вина. Аще жена без своего мужа иметь ходити, или пити, или ясти, а опрочь своего дому иметь спати, а потом объясниться,- разлучити.

4 вина. Аще иметь жена ходити по игрищом или во дни, или в нощи, а муж иметь усчювати, а она непослушаеть,- разлучити.

5 вина. Аще ведет жена мужа своего покрасти клеть или товар, или сама покрадет да иным подаст, или иметь ведати, што хотят церковь покрасти, а она мужу своему не скажет,- разлучити.


Cообщения serGild
Красницкий Евгений. Форум. Новые сообщения.
Красницкий Евгений. Форум сайта » 5. Академия (Реальная история) » Право 12 век » 2. Церковные уставы Владимира и Ярослава (Законы о преступлениях против морали)
  • Страница 1 из 1
  • 1
Поиск:

Люди
Лиса Ридеры Гильдия Модераторов Сообщество на Мейле Гильдия Волонтеров База
данных Женская гильдия Литературная Гильдия Гильдия Печатников и Оформителей Слобода Гильдия Мастеров Гильдия Градостроителей Гильдия Академиков Гильдия Библиотекарей Гильдия Экономистов Гильдия Фильмотекарей Клубы
по интересам Клубы
по интересам
legionerus, Andre, Домовой,


© 2024





Хостинг от uCoz | Карта сайта